Үүсгэн байгуулагчийн үг
Зөвлөхийн зам
Намайг Г. Ангар гэдэг.
2007 оноос хойш — ISO-г Монголд бараг ярьдаггүй байсан үеэс — энэ салбарт ажиллаж байна. ISO 9001-ийн үндэс болсон BS 5750 стандартыг боловсруулсан BSI (Британийн Стандартын Институц)-д ахлах аудитороор бэлтгэгдэж, бодит аудитуудад биечлэн оролцсон. Олон улсын итгэмжлэлтэй гэрчилгээжүүлэх байгууллагад ахлах аудитороор олон жил ажилласан туршлагатай — гэрчилгээжилтийн аудитыг «нөгөө талаас» нь ч сайн мэднэ.
Өмнө нь би гадаадын мэргэжилтнүүд, компаниудтай хамтран ажиллаж, мөн бие даасан зөвлөхөөр ажиллаж байлаа. Харин одоо өөрийн компаниа байгуулж, энэ салбарын хөгжилд бодитой хувь нэмэр оруулахаар шийдсэн юм.
Гэхдээ ажлаа өөр хүнд даатгахгүй. Танай төслийг эхнээс нь дуустал би өөрөө чиглүүлнэ. Та компанитай биш, зөвлөхтэйгөө шууд ажиллана.
Цаас биш. Ажилладаг тогтолцоо.
Миний ажил бол танай өмнөөс баримт бичиг боловсруулж өгөх биш. Танай компанийг бодитоор хөгжүүлж, сайжруулдаг, өдөр бүр амьд ажилладаг тогтолцоог бий болгоход туслах явдал юм.
Олон хүний мэддэггүй нэг үнэн: ISO 9001:2015 стандарт нь тусгайлан нэрлэсэн «баримтжуулсан журам» бичихийг шаарддаггүй. Гэхдээ шаардлагатай хяналт, баримтжуулсан мэдээлэл нь бодитоор ажиллаж, тогтмол хэрэгжих ёстой. Сайн тогтолцоонд зузаан хавтас хэрэггүй.
Тогтолцоог танай байгууллага өөрөө бүтээнэ — би замыг нь зааж, магадлан итгэмжлэгдсэн гэрчилгээжүүлэх байгууллагын аудитад бүрэн бэлтгэнэ. ISO 9001, 14001, 45001, 22000, 27001. Мөн олон улсад хүлээн зөвшөөрөгдсөн, нэр хүндтэй гэрчилгээжүүлэх байгууллагыг сонгоход тань тусална.
Гэрчилгээ бол зорилго биш — ажилладаг тогтолцооны үр дүн юм.
Миний зорилго ганц компаниар хязгаарлагдахгүй. Exemplar Global-ийн гэрчилгээтэй түнш байгууллагатай хамтран, гадаад мэргэжилтнүүдийн удирдсан сургалтыг үнэ төлбөргүй санхүүжүүлж — олон арван жилээр батлагдсан арга зүйг эзэмшсэн жинхэнэ зөвлөхүүдийг Монголдоо бэлтгэхэд хувь нэмрээ оруулна.
Монголын байгууллагууд олон улсын тавцанд өрсөлдөхөд бэлэн. Дутагдаж байгаа нь чадвар биш — ажилладаг тогтолцоо. Түүнийг хамтдаа бүтээцгээе.
